الكـــــــــــــــــــــــــــــــــــــوسة => القرع

مين فينا ما يعرفش الكوسة ؟؟؟طبعا عارفينها و بنحبها كلنا بكل أشكال طبخها إشي محشي كوسة باللحم المفروم و لا طاجن كوسة و بطاطش بالكريمة و لا مشكل كوسة مع جزر مع معرفش ايه و لا كوسة بالزبد و لا مقلية و لا كوسة بالباشميل و فيه بأة كوسة بالطريقة المصرية و المغربية و الفرنسية ، ما علينا ، أهي كلها كوووووسة .

بتقولوا ايه الجديد ؟؟؟؟؟ الجديد ان بلدنا بقت كلها كوسة و ما حدش يفهمني غلط ،، انا قصدي عندنا كوسة كتير عشان رخيصة ،

بسأل أمي و اقلها يا حاجة : هي الكوسة بكام اليومين دول ؟ قالتلي من الفلاحة اللي بتبيعها في السوق بجنيه و من المحل باتنين جنيه ، يعني حاجة كدة ببلاش ،، قلتلها طيب انتي عاملالنا ايه النهاردة ؟ قالتلي عملالك يا محمد محشي كوسة باللحم المفروم زي العسل حتاكل صوابعك وراه ،،، و الله ده حصل يا اخوانا النهاردة و لسة واكل المحشي قبل ما اكتب الموضوع ده بنص ساعة ،،

اللي عاوز اقوله كلكم عارفينه ،،

لكن للأسف كلنا ساكتين ما بنتكلمش " صم بكم عمي " أعوذ بالله

كل حاجة في بلدنا بقت كوسة ،،، عشان تدخل كلية عسكرية بالكوسة ،، عشان تحول من مكان عمل لمكان تاني بالكوسة ،، عشان ست أرملة تصرف معاشها المتأخر بالكوسة ،، عشان تدخل حجرة العمليات بالكوسة ،، عشان تاخد تصريح دفن برضه بالكوسة .عشان تتنفس صح محتاج كوسة
عشان تعيش صح محتاج كوسة
عشان تشتغل صح محتاج كوسة
عشان تخش الكلية الفلانية محتاج كوسة
عشان تظبط الدكتور الفلاني محتاج كوسة

انا فكرت كتير لغاية ما وصلت لحل

الحمد لله الكوسة رخيصة ( تقريبا الحكومة مش واخدة بالها ) ههههههه

كل مواطن يشتريله خمسة كيلو كوسة بعشرة جنيه و لو من الفلاحة يبقى بخمسة جنيه و انت و شطارتك ، و لما تحب تقضي مصلحة ، طلع كوساية واحدة بس و اديها للمسئول حيخلصلك مصلحتك علطول و ان خلص القرع انا مش مسئول

الخوف انعم يطمعوا اكتر و يقولولك طيب فين اللحمة المفرومة ؟؟؟

ساعتها يبقى عليك العوض ..

( لو كان النيل كله صلصة ..ما كانش كفى الكوسة اللي في البلد )

واحد صاحبي حبيبي بيشتغل مدرس في مكان بعيد جدا منذ 7 سنوات ،، منى عينه ينقل قريب مش عارف ،، زميله بأة و دفعته و نفس القسم نقل بعد سنة واحدة من تعيينه ، طبعا بالكوسة ؟

بيتهيألي ان الكوسة دي بقت أهم حاجة في حياتنا ،، و الله الواحد خايف للحكومة تشم خبر و تغليها لكن اللي بيطمن الواحد ان حكومتنا الموقرة ما لهاش دعوة بالكوسة خاااااااالص لا من قريب و لا من بعيد.

و النبي يا جماعة لو حد عنده اتنين كيلو كوسة حلوين كدة و حجم وسط يبعتهملي ينوبه ثواب ، اصل انا عاوز انقل من مدرستي لمدرسة تانية .

بالهنا و الشفا

نشاهد شعر مؤثر لزهرة فلسطينية بعنوان : فلسطيني أنا اسمي فلسطيني